அவியல் – சமையல் குறிப்பு – மகளிர் பகுதி

அவியல் – சமையல் குறிப்பு – சமையல் பகுதி – Recipe – மகளிர்ப் பகுதி

தேவையான பொருட்கள்

• தேங்காய் = 1 மூடி (தேங்காய் அதிக முற்றலாக இருக்கக் கூடாது.)
• கருணைக்கிழங்கு = 150 கிராம்
• பச்சை மிளகாய் = 6 (காரம் குறைந்த மிளகாயாக இருந்தால் 8)
• முருங்கைக் காய் = 2
• வாழைக்காய் = 1
• கத்திரிக்காய் = 100 கிராம்
• கொத்தவரங்காய் = 100 கிராம்
• பீன்ஸ் = 100 கிராம்
• உருளைகிழங்கு = 3
• பெரிய வெங்காயம் = 2
• மாங்காய் = புளிப்பு இல்லாத ஒட்டுக்காய் பாதி அளவு
• புளி = 25 கிராம்
• கறிவேப்பிலை = சிறிது
• சீரகம் = 1/2 மேசைக்கரண்டி
• மஞ்சள் தூள் = 1/2 மேசைக்கரண்டி
• தேங்காய் எண்ணெய் = 3  மேசைக்கரண்டி
• உப்பு = தேவைக்கேற்ப

செய்முறை

1. முதலில் எல்லாக் காய்கறிகளையும் நன்றாக கழுவி எடுக்கவும். கழுவிய காய்களை நீள, நீளமாக அரிந்து கொள்ளவும்.
2. பச்சைமிளகாயையும், மாங்காயையும் நீளவாக்கில் கீறி, தனியாக எடுத்து வைத்துக்கொள்ளவும்.
3. ஒரு அகலமான பாத்திரத்தில், வெங்காயத்தை அரிந்து, அரிந்து வைத்த காய்கறிகளுடன் போட்டு தண்ணீர் ஊற்றி, மஞ்சள் தூளையும் சேர்த்து போட்டு வேகவிடவும்.
4. தேங்காயுடன் சீரகத்தையும் சேர்த்து அதிகம் மசிந்துவிடாதபடி அரைத்து, விழுதை எடுப்பதற்கு சற்று முன்பு, கறிவேப்பிலையையும் சேர்த்து அரைத்து எடுக்கவும். (குறிப்பு: கறிவேப்பிலை ஒன்றிரண்டு துண்டுகளாக இருந்தால், அவியல் நல்ல மணத்துடன் இருக்கும்.)
5. வெந்துகொண்டிருக்கும் காய்கறியுடன், தனியாக அரிந்து வைத்த   ப.மிளகாயையும் மாங்காயையும் போடவும்.  புளியை அதில் கரைத்து ஊற்றவும். உப்பையும் அதனுடன் போட்டு கரண்டியை திருப்பி அதன் கைப்பிடி பகுதியால் காய் குழையாதவாறு கிளறிவிடவும்.
6. காய் வெந்தவுடன் அரைத்த தேங்காய் விழுதைச் சேர்த்து அதில் போட்டு கிளறவும்.
7. தண்ணீர் அதிகமாகாதவாறு கொஞ்சம் கெட்டியாக இருக்கவேண்டும். அவியல் கெட்டியானவுடன் இறக்கி வைத்து தேங்காய் எண்ணெய் ஊற்றி கிளறி வைக்கவும்.

இப்போது சுவையான, அவியல் தயார்.