அத்திக்காய் கூட்டு – சமையல் பகுதி – மகளிர்ப்பகுதி – Figs Curry – Semi-Gravy – Recipe
தேவையான பொருட்கள்
- சிறிய அத்திக்காய் (நாட்டு அத்தி) = 1/4 கிலோ கிராம் (குறிப்பு: நாட்டு அத்திக்காய், காய்கறி கடைகளில் கிடைக்கும். சில வீடுகளிலும், கிராமப்புறங்களில் தோட்டங்களிலும் அத்தி மரங்கள் இருக்கும்.)
- கடலைப்பருப்பு (அல்லது) பச்சைப்பருப்பு
- சீரகம் = 1/2 மேசைக்கரண்டி
- சோம்பு = 1/4 மேசைக்கரண்டி
- பெருங்காய்த்தூள் = 1 சிட்டிகை
- குழம்பு மிளகாய் தூள் = 1 மேசைக்கரண்டி
- எண்ணெய் = 50 மிலி
- கடுகு = தாளிக்க சிறிது
- தேவைக்கேற்ப உப்பு
செய்முறை
- முதலில் அத்திக்காயை சுத்தமாகக் கழுவி எடுத்துக் கொள்ளவும். பின் அத்திக்காயை சிறு கல்லினால் அல்லது பூண்டு நசுக்கும் சிறு உலக்கையால் உடைத்து, தண்ணீரில் போட்டு அதில் உள்ள விதையை நீக்கவும்.
- விதை நீக்கிய அத்திக்காயை மின் அரைவை எந்திரத்தில் (மிக்சியில்) இலேசாக போட்டு ஒன்று இரண்டாக அரைத்து எடுக்கவும்.
- பின் அடுப்பை பற்றவைத்து பாத்திரத்தில் தண்ணீர் ஊற்றி பருப்பை போட்டு வேகவைக்கவும். மிளகாய், தேங்காய், சீரகம் இவற்றை மிக்சியில் போட்டு தனியாக அரைத்து வைத்துக்கொள்ளவும். பருப்பு 1/2 பதமாக வேகும்பொழுது பூண்டை உரித்து அதில் போடவும். அதனுடன் சோம்பு, மிளகாய்த்தூள், மஞ்சத்தூள் இவற்றையும் சேர்த்து வேகவிடவும். பருப்பு வெந்தவுடன் அவற்றை தனியாக இறக்கி வைக்கவும்.
- பின் அடுப்பில் ஒரு அகலமான பாத்திரத்தை வைத்து எண்ணெய் ஊற்றவும். எண்ணெய் காய்ந்தவுடன் கடுகைப் போடவும். கடுகு வெடித்தவுடன் மிக்சியில் அரைத்த அத்திக்காயை போட்டு உப்பு சேர்த்து கிளறவும். பாத்திரத்தில் அடிபிடிக்காமல் இருக்க சிறிது தண்ணீர் விட்டு நன்றாக கிளறவும். (குறிப்பு: கூட்டில் அதிக தண்ணீர்விடாமல் இருக்கவேண்டும்.)
- அத்திக்காய் நன்றாக வெந்தவுடன், முதலில் வேகவைத்த பருப்பையும் அத்திக்காயில் போட்டு கிளறவும். அரைத்த தேங்காய் விழுதையும், பெருங்காயத்தையும் போட்டு அதனுடன் கிளறிவிட்டு இறக்கவும்.
இப்போது சுவையான அத்திக்காய் கூட்டு தயார்.